سٹی ٹریفک پولیس کی کورونا وائرس سے بچنے کیلئے شہریوں میں گلوز تقسیم

پشاور سٹی ٹریفک پولیس پشاور کی ایجوکیشن ٹیم نے چارسدہ روڈ پر شہریوں میں کورونا وائرس سے بچنے کیلئے گلوز اور احتیاطی تدابیر پر مشتمل پمفلٹس تقسیم کئے ۔ تفصیلات کے مطابق ایس ایس پی ٹریفک وسیم احمد خلیل کی ہدایت پر سٹی ٹریفک پولیس پشاور کی ایجوکیشن ٹیم نے ڈی ایس پی شازیہ شاہد کی سربراہی میں شہر کے مختلف سیکٹروں میں شہریوں کو کورونا وائرس سے بچنے سے متعلق آگاہی دی اور ان میں اس وباء سے بچنے کیلئے احتیاطی تدابیر پر مشتمل پمفلٹس تقسیم کئے اور شہریوں کو ہدایت کی کہ وہ گھروں سے غیر ضروری کام کیلئے نہ نکلیں اور زیادہ میل جول سے گریز کریں ۔ ایس ایس پی ٹریفک وسیم احمد خلیل نے ٹریفک ہیڈ کوارٹر سے جاری کردہ نیوز رپورٹر میں کہا ہے کہ حکومت کی جانب سے لاک ڈائون میں نرمی کا اعلان کیا گیا ہے جبکہ لاک ڈائون کو ختم نہیں کیا گیا ہے لہٰذا شہری اپنی اور دوسروں کی صحت کا خاص خیال رکھتے ہوئے حکومت کی جانب سے جاری کردہ احکامات پر عملدرآمد کو یقینی بنائیں اور وباء کو ختم کرنے میں اپنا کردار ادا کریں ۔ انہوں نے مزید کہا کہ سٹی ٹریفک پولیس پشاور اس خطرناک اور جان لیواء وباء کے خاتمے تک آگاہی مہم کا سلسلہ جاری رکھے گا تاکہ شہریوں کی زندگیوں کو محفوظ بنایا جا سکے ۔