ٹریفک عملے کی تجاوزات مافیا کیخلاف کارروائیاں‘ 2 ٹرک سامان ضبط‘ 17 افراد گرفتار

پشاور سٹی ٹریفک پولیس پشاور نے تجاوزات مافیا کیخلاف کارروائیاں کرتے ہوئے 2ٹرک سامان قبضے میں لیکر 17 افراد کو گرفتار کرلیا۔ تفصیلات کے مطابق چیف ٹریفک آفیسر *وسیم احمد خلیل* کی ہدایت پر سٹی ٹریفک پولیس پشاور کے اہلکاروں کی جانب سے شہر بھر میں تجاوزات مافیا کو رضا کارانہ طور پر تجاوزات ختم کرنے کی ہدایت کی گئی تاہم تجاوزات مافیا کی جانب سے اس پر عملدرآمد نہیں کیا جا رہا تھا جس پر سٹی ٹریفک پولیس پشاور کے اہلکاروں کی جانب سے مختلف سیکٹروں میں کاروروائیاں کی گئیں جس کے تحت کیجولٹی روڈ اور بورڈ بازار میں آپریشن کے دوران 9افراد کو گرفتار کر کے ایک ٹرک سامان قبضے میں لے لیا جبکہ ٹاؤن سیکٹر سے کارروائیوں کے دوران 8افراد کو گرفتار کر کے ایک ٹرک سامان قبضے میں لے لیا۔ اسی طرح دلہ زاک روڈ سے غیر قانونی سٹینڈ قائم کرنے پر 8 سوزوکی مالکان اور خوشحال بازار سے نو پارکنگ زون میں موٹر سائیکلیں کھڑی کرنے پر 8 موٹر سائیکل سواروں کو گرفتار کرلیا اور گاڑیوں کو ٹرمینل میں بند کردیا۔ چیف ٹریفک آفیسر نے ٹریفک ہیڈ کوارٹر گلبہار سے جاری کردہ پریس ریلیز میں کہا ہے کہ تجاوزات مافیا رضا کارانہ طور پر تجاوزات کا خاتمہ کریں بصورت دیگر ان کے خلاف سخت قانونی کارروائی عمل میں لائی جائیگی کیونکہ تجاوزات قائم کرنے سے ٹرانسپورٹروں اور راہ گیروں کو شدید مشکلات کا سامنا کرنا پڑتا ہے۔ انہوں نے کہا کہ شہری گاڑیاں اور موٹر سائیکلیں پارکنگ سٹینڈ میں کھڑی کریں جبکہ نو پارکنگ زون میں موٹر سائیکلیں اور گاڑیاں کھڑی کرنیوالوں کی گاڑیاں ٹرمینل میں بند کی جائیں گی۔