سٹی ٹریفک پولیس پشاور کی شہریوں کو ٹریفک قوانین سے متعلق آگاہی

پشاورسٹی ٹریفک پولیس پشاور نے شہریوں کو ٹریفک قوانین سے متعلق آگاہی دی۔ ایس ایس پی ٹریفک وسیم احمد خلیل کی ہدایت پر ایجوکیشن ٹیموں نے شہر کے مختلف سیکٹروں میں ٹریفک قوانین‘ ٹائر لائف‘ ہیلمٹ‘ سیٹ بیلٹ‘ تیز رفتاری‘ روڈ کراسنگ اور دوران سفر موبائل فون کے استعمال کے نقصانات کے بارے میں عوام کو مطلع کیا۔ ٹریفک عملے نے شہر کے مختلف علاقوں میں لاؤڈ سپیکرز کے ذریعے راہ گیروں کو بھی اس سلسلے میں معلومات فراہم کیں اور ان میں باقاعدہ پمفلٹس تقسیم کئے۔ ایس ایس پی ٹریفک *وسیم احمد خلیل* نے ٹریفک ہیڈ کوارٹر گلبہار سے جاری کردہ پریس ریلیز میں کہا ہے کہ شہری ٹریفک قوانین کی پابندی کرتے ہوئے اپنے اور دوسروں کا خصوصی خیال رکھیں اور سیٹ بیلٹ اور ہیلمٹ کے استعمال کو یقینی بنا کر حادثات سے خود کو بچائیں۔ انہوں نے مزید کہا کہ دوران سفر موبائل فون کے استعمال کو ترک کر کے اپنی اور دوسروں کی زندگیوں کو محفوظ بنایا جا سکتا ہے کیونکہ یہ ڈرائیونگ سے توجہ ہٹانے کی وجہ بن کر کسی بھی بڑے حادثے کا سبب بن سکتا ہے۔ انہوں نے مزید کہا کہ تیز رفتاری جان لیوا اقدام ہے چند منٹ تاخیر سے جانا موت کے منہ میں جانے سے بہتر ہے لہٰذا شہری تیز رفتاری سے گریز کریں۔ انہوں نے مزید کہا کہ شہری بروقت اپنی گاڑیوں کو چیک کریں کیونکہ ٹائرز کا مخصوص لائف ٹائم ہوتا ہے جس کو نظر انداز نہیں کیا جا سکتا۔ چیف ٹریفک آفیسر نے واضح کیا کہ ڈرائیورز حضرات اور پیدل چلنے والے افراد روڈ کراسنگ کے وقت بزرگ افراد کا خاص خیال رکھیں کیونکہ بزرگ افراد آہستہ سڑک عبور کرتے ہیں جن کا خیال رکھنا ہم سب پرفرض ہےر