رمضان میں شہری غیر ضروری کاموں کیلئے گھروں سے نہ نکلیں،انیلہ ناز

پشاور سٹی ٹریفک پولیس پشاور نے رمضان المبارک کیلئے خریداری کیلئے بازاروں کا رخ کرنیوالوں کو کورونا وائرس سے نمٹنے کیلئے آگاہی دینے کا سلسلہ شروع کردیا۔ تفصیلات کے مطابق ایس ایس پی ٹریفک وسیم احمد خلیل کی ہدایت پر سٹی ٹریفک پولیس پشاور کی ایجوکیشن ٹیموں نے ڈی ایس پی انیلہ ناز اور ڈی ایس پی شازیہ شاہد کی قیادت میں مختلف بازاروں کے دورے کئے۔ ایجوکیشن ٹیموں کی جانب سے شہریوں کو بازاروں میں ایک دوسرے سے فاصلہ رکھنے کی ہدایت کی اور کہا کہ وہ غیر ضروری کاموں کیلئے گھروں سے نہ نکلیں۔ انہوں نے کہا کہ دکانداروں کو بھی چاہئے کہ وہ اپنی دکانوں کے باہر چونے کے ذریعے 4 فٹ فاصلے سے گول دائرے بنائیں اور حکومتی احکامات کی خلاف ورزی کرنیوالوں کو سودا سلف دینے سے گریز کیا جائے۔ ایس ایس پی ٹریفک *وسیم احمد خلیل* نے ٹریفک ہیڈ کوارٹر سے جاری کردہ پریس ریلیز میں کہا ہے کہ ٹریفک قوانین پر عملدرآمد کو یقینی بنانے سمیت شہریوں کی زندگیوں کو محفوظ بنانا اولین ترجیح سمجھتے ہیں۔ انہوں نے کہا کہ شہر کے بازاروں میں آگاہی سیشنز کا انعقاد کرنے سمیت احساس ایمرجنسی پروگرام کے تحت رقم وصول کرنے والوں اور شہر میں مختلف مقامات پر ناکہ بندیوں پر آگاہی دینے کا مقصد شہریوں کو یہ باور دلانا ہے کہ کورونا وائرس ایک خطرناک وائرس ہے جس پر قابو پانے میں عوام کا تعاون انتہائی ضروری ہے۔